Gérard Genette

Gérard Genette (Paris, 1930eko ekainaren 7a - 2018ko maiatzaren 11) literatura-kritikari frantsesa izan zen. Egitura-azterketaren eta forma literarioen teoriaren ordezkari nagusietako bat.

Frantses literaturako irakasle izan zen Sorbonako Unibertsitatean, Parisen. Bere artikulu hoberenak ''Figures'' (1966, ''Irudiak''), ''Figures II ''(1969) eta ''Figures III ''(1972) liburuetan bildu zituen. Lehenengo bietan kontakizunen egitura, barrokoaren erretorika, ''Nouveau roman''a eta poetika narratiboa aztertu zituen, poetika literarioa eta generoen teoria txandakatuz etengabe. Hirugarrenean ere aurrekoetako hausnarketa bera egin zuen: erretorika hitz egiteko irudien errepertorio gisa ez ezik, generoen teoria gisa ere ulertuz (Kritika eta poetika, Erretorika mugatua, Metonimia Prousen obran). Azken obra horretan, Genettek, ''Denbora galduaren bila'' obraren egitura narratiboak aztertuz, narrazioaren teoria bat egin zuen. Aurrerago, ''Nouveau discours du récit'' (1983, ''Kontakizunaren diskurtso berria'') obran, literaturaren osagai semiologikoak sakondu zituen. Beste lan batzuk: ''Mimologiques: voyage en Cratylie'' (1976, ''Mimologikak: bidaia Cratyliera'') eta ''Introduction à l´architexte'' (1970, ''Artxitestuari buruzko sarrera'') idazlanetan, poetika generikoaren fenomenoen deskripzio estrukturalista egin zuen; ''Palimpsestes'' (1982, ''Palimpsestoak'') obran, berriz, testuartekotasunak literaturan jokatu duen papera aztertu zuen, imitazioa, parodia eta beste genero-mota batzuen bitartez, berak "paratestu" deitzen duenaren bitartez alegia. Wikipediatik informazioa lortu