Erich Mendelsohn

Erich Mendelsohn (Allenstein, Prusia, gaur egun Olsztyn, Polonia, 1887ko martxoaren 21a - San Frantzisko, 1953ko irailaren 15a) alemaniar arkitektoa izan zen. 1920ko hamarkadan arkitektura espresionistagatik eta zinema eta saltoki handietarako proiektuen funtzionalismo dinamikoagatik da ezaguna.

Familia judu batean jaio zen. Merkataritza ikasten hasi zen eta gero arkitekturarekin jarraitu zuen Berlinen eta Munichen.

1918an Berlinen hasi zen lanean eta arrakasta lortu zuen bi eraikinekin: Potsdameko Einstein Dorrea eta Luckenwaldeko kapela fabrika.

1924an ''Der Ring'' arkitektura taldea sortu zuen Ludwig Mies van der Rohe eta Walter Gropiusekin batera. Eraiki zituen saltoki handiak Weimarko Errepublikaren kontsumismoaren isla dira, sobietar sozialisten esperimentuak ere erakarri zuen. Moskun Bandera Gorria ehungintza fabrika eraiki zuen.

1933an naziengandik ihes egin eta Ingalaterran kokatu zen. Bertan De la Warr pabiloia bezalako lanak eraiki zituen, art deco estilokoak.

Bere lagun Chaim Weizmannek hainbat eraikin eskatu zizkion Palestinan. Nazioarteko estiloko eraikin horiek eragin handia izan zuten tokiko arkitekturan.

1941etik hil arte Kalifornian bizi izan zen eta Berkeleyko Unibertsitatean irakatsi zuen. Wikipediatik informazioa lortu